لما تنقطع الكهربا افرح ...لأنك راح تضطر تفتح عيونك زيييين
مشان تميز اللي حولك وهذا الشي رح يقوي حاسة النظر عندك ويخليك تعرف
الأحجام والأوزان الحقيقية للأشياء!!!
لما تنقطع الكهربا افرح...لأنك راح تقعد من دون تلفزيون ودش وكمبيوتر يعني
راح تضطر تقعد مع اهلك ورح تفتحون مواضيع صار لها زمان ما انفتحت وبالتالي
رح تكتشف شخصيات أهلك الحقيقية وأرائهم وتوجهاتهم
لما تنقطع الكهربا افرح ...لأنك راح تحس بحال الناس وانو الدنيا ماتسوى قشر
بصلة ورح تقول اييييييه شقدني محظوظ على هالنعمة ..وبالتالي راح تتحول
لشخص قنوع وراضي وصاحب نفسية متواضعة ..وهالشي ماكان راح يصير لو ما انقطعت
الكهربا (( اللهم لك الحمد ))
لما تنقطع الكهربا افرح ...لأنك راح تعرف انت وين عايش بدون بوصلة يعني بين
طبقة الأغنياء أو طبقة الفقراء ورح تتذكر المثل اللي يقول ((على قد لحافك
مد رجليك )) وهذا الشي رح يفيدك بعملية تحديد أهدافك وطموحك
لما تنقطع الكهربا افرح ...لأنك راح ترتاح من صوت المكيفات والغسالات
والمسجلات ورح تشعر بهدوء فقدتو من زمان وتبلش تتذكر أيام جدك وحبابتك
((فلم وثائقي ))
لما تنقطع الكهربا افرح ...لأنك راح تتعلم معنى الصبر وأن الحياة مو دائمآ
مثل مابدنا ...لازم نصبر ونتحمل مشان نصير زلم ...قال تعالى (( وبشر
الصابرين ))
لما تنقطع الكهربا افرح ...وخاصة ً لما تكون زايرة عندكم أختك الكبيرة
وأطفالها.. وسام ..وخالد..ولين ..ولجين رح تحس لاول مرة إنك أغلى خال عندهم
وإنهم لازقين لقلبلك ومتعربشين بيك تعربش ((من الخوف طبعآ مو غلاة ولما
تجي الكهربا أقول لأبن اختي خالد اعطيني بوسة يوال يقلي انقلع ويجيبني هذاك
الكف ))
لم تنقطع الكهربا افرح ...لأنك راح تفكر انت وأهل حارتك بشي واحد وبنفس
الوكت وهو (( ايمت تجي الكهربا )) وهذا الشي ماصار ولاراح يصير بحياتو لأول
مرة تفكر انت وأهل حارتك بنفس التفكير وبنفس الوكت وبالتالي رح تتقوى
روابط المجتمع وتتوحد الأهداف
ملاحظة : يدرس حاليآ اقتراح قطع التيار الكهربائي على مؤتمر القمة العربية المقبلة <<<<(( نجرب.... يمكن تزبط))
يعني بصراحة احنا جماعة بطرانين ...فوق كل هالفوائد من انقطاع الكهربا ولسا مابي شي عاجبنا !!!
